THE latest community news from Llanddeiniol

Cymdeithas Ddiwylliannol yr Hebog

‘RHAI o Gymeriadau’r Mynydd Bach’ oedd testun sgwrs Rheinallt Llwyd yn Festri Elim ar yr ail nos Fawrth o’r flwyddyn newydd.

Cadeirydd y Gymdeithas, y Parch Nicholas Bee, groesawodd a chyflwynodd y siaradwr.

Tywyswyd yr aelodau trwy gyfrwng llun ar y sgrîn i bentrefyn Llangwyryfon.

Yma y cartrefodd Rheinallt Llwyd am gyfnod helaeth ar ddechrau saith degau’r ganrif ddiwethaf.

Cyfeiriodd at y newidiadau dirfawr a welwyd o ran y tirlun ac a brofwyd gan drigolion yr ardal.

Diddorol oedd y sylwadau a wnaed am gyfraniad a dylanwad teuluoedd.

Erys yr hanesyn am natur aelodaeth y cyngor cymuned a’r patrwm a fabwysiadwyd am flynyddoedd lawer yn fyw yn y cof.

Heb os llwyddwyd i ennyn chwilfrydedd y gynulleidfa oherwydd dawn gynhenid Rheinallt Llwyd i draethu’n rhwydd.

Elfen amlwg o fywyd rhai pobl yn ystod ei flynyddoedd cynnar yn y pentrefyn oedd yr arfer o ymgynnull mewn llefydd amrywiol.

Soniodd am y cymdeithasu yn y gweithdy ym Morfa Du a’r crynhoi gyda’r hwyr yn un o siopau’r fro.

Pump o gymeriadau’r cylch oedd canolbwynt y cyflwyniad a chyfoethogwyd yr hanesion oherwydd y cyfle i weld lluniau ohonynt.

Awgrymodd Rheinallt Llwyd y gwelwyd diwedd yr hen oes wrth i’r ardal weddnewid.

Yn sicr bu mewnlifiad helaeth o fewn ffiniau’r hen blwyf a chafwyd dadansoddiad treiddgar o’r gymdeithas a esblygodd ar y Mynydd Bach.

Nododd gyfraniad Peter Lord a Jez Danks i’r gymuned a thu hwnt, gan bwysleisio doniau creadigol rhai o’r mewnfudwyr.

Adnabyddiaeth; gwybod pwy yw pwy neu beth yw beth.

Dyma oedd sail llwyddiant cyflwyniad Rheinallt Llwyd a thalwyd y diolchiadau gan Ieuan Parry.

If you’re a member of a club, society or group, send your news to [email protected]